Baitul Ma'arif || Darul Ifta

معاشرت / نکاح

India

سوال # : 1113

کیا فرماتے ہیں مفتیان کرام اس مسئلہ ذیل کے بارے میں۔۔ 

میری پہلی طلاق کے ۱۲ سال کے بعد میرا دوسرا نکاح ہوا میرے پاس پہلے شوہر سے ایک بیٹا ہے۔ اب سے ۲ سال قبل میرا دوسرا نکاح ہونے سے پہلے میں نے اپنی ساری پریشانی میرے ہونے والے دوسرے شوہر کے سامنے رکھی تو ان ہونے میرے بیٹے کے ساتھ ہر بات کو قبول کیا اور پوری ذمہ داری  اپنے والدین کے سامنے لی اور انکے والدین بھی اس میں پوری طرح شریک تھے۔۔ اب میرے شوہر ہر طرح کی زمیداری سے پلٹ گئے ہیں اور میرے بیٹے کو بھی قبول نہیں کر رہے ہیں اور جس گھر میں مجھے رکھا تھا وہ بھی فروخت کردیا ہے۔  میرے شوہر مجھے بار بار جلدی جلدی ہر ۲ ماہ میں مجھے رخصت کردیتے  ہیںمیری والدہ کے گھر بھیج دیتے ہیں اور میںجانانہیں چاہتی میرے شوہر کی پہلی بیوی بھی ہیں لیکن انکو انکی والدہ کےگھر نہیں بھیجتے۔۔ اور میری والدہ کا گھر 260 کلومیٹر فاصلے پر ہے اور مجھے آسانی سےواپس نہیں بلاتے ۔۔اب جب میں شوہر کے پاس جاؤں تو کیا میرے شوہر کو میرے پاس اتنے ہی روز لگاتار رہنا چاہیے جتنے روز میں والدہ کےگھر رہی ہوں اور وہ پہلی بیوی کے پاس رہے۔۔اس مسئلے میں میری رہنمائی فرمائیں۔۔ 
۔   اس مسئلے میں میری رہنمائی فرمائیں۔۔ ۔ فقط وسلام۔۔ 
                                                                     حمیرہ خان۔۔ ممبرا ضلع ٹھانے مہاراشٹرہ

Published On : Nov 04, 2022

جواب : 1113

بسم الله الرحمن الرحيم

الجواب وباللہ التوفیق

الجواب باسم ملھم الصواب ۔
          واضح رہے کہ شریعتِ مطہرہ نے جہاں مرد کو ایک سے زائد نکاح کی اجازت دی ہے وہاں مرد کو اس بات کا پابند بھی کیا ہے کہ وہ اپنی بیویوں کے درمیان لباس پوشاک، نان و نفقہ، رہائش کی فراہمی اور شب باشی وغیرہ میں برابری کرے، اور بیویوں کے ان حقوق میں کسی قسم کی کوتاہی نہ کرے،  یہاں تک کہ ایک بیوی کے پاس جتنی راتیں گزارے اتنی ہی راتیں دوسری بیوی کے پاس بھی گزارے، اور ایک بیوی کو جتنا نان و نفقہ و دیگر ضروریات کا سامان چھوٹی بڑی تمام اشیاء ،تحفہ تحائف وغیرہ دے اتنا ہی دوسری بیوی کو بھی دے ؛ پس جو شخص اپنی بیویوں کے درمیان برابری نہیں کرتا تو ایسے شخص کے لیے سخت وعیدات بزبانِ نبی آخر الزماں وارد ہوئی ہیں، جب کہ بیویوں کے درمیان عدل و انصاف کرنے والے مردوں کے حق میں رسول اکرم صلی اللہ علیہ وسلم نے بشارتیں دی ہیں۔

عن ابی هريرة عن النبي صلي الله عليه وسلم قال: إذا كانت عند رجل إمرأتان فلم يعدل بينهما جاء يوم القيامة و شقه ساقط". رواه الترمذي و أبو داؤد و النسائي و ابن ماجه و الدارمي". (مشكاة، باب القسم: الفصل الثاني، ٢/ ٢٨٠، ط: قديمي)
   ترجمہ: حضرت ابو ہریرہ رضی اللہ عنہ رسول اکرم صلی اللہ علیہ وسلم کا فرمان نقل کرتے ہیں:  جس شخص کے نکاح میں (ایک سے زائد مثلاً) دو بیویاں ہوں  اور وہ ان دونوں کے درمیان عدل و برابری نہ کرے تو قیامت کے دن (میدانِ محشر میں) اس طرح سے آئے گا کہ اس کا آدھادھڑ ساقط ہوگا۔
          دوسری حدیث میں ہے کہ جس شخص کی دو بیویاں ہوں اور ان میں سے ایک کی طرف مائل ہو گیا تو وہ روز قیامت اس حال میں آئے گا کہ اس کے جسم کی ایک جانب فالج زدہ ہوگی۔
               رسول الله صلي الله عليه وسلم: من كانت له إمرأتان فمال إلى أحدهما جاء يوم القيامة و شقه مائل أي مفلوج". (مرقاة المفاتيح، ٦/ ٣٨٤، ط: رشيدية)
        مسلم شریف میں ہے:
                     عن عبدالله بن عمرو... قال: قال رسول الله صلي الله عليه وسلم: إن المقسطين عند الله على منابر من نور عن يمين الرحمن عز و جل، و كلتا يديه يمين، الذين يعدلون في حكمهم و أهليهم و ما ولوا". (كتاب الإمارة، باب فضيلة الإمام العادل)
                 
             ترجمہ: حضرت عبد اللہ بن عمرو رضی اللہ عنہما رسول اللہ صلی اللہ علیہ وسلم کا فرمان نقل کرتے ہیں کہ :  انصاف کرنے والے اللہ کے نزدیک نور کے منبروں پر رحمٰن کے دائیں جانب ہوں گے،  اور  اللہ کے دونوں ہاتھ یمین ہیں۔ یہ وہ لوگ ہیں جو اپنی رعایا کے ساتھ اور اپنے اہل و عیال کے ساتھ انصاف کرتے ہیں۔

         فتاوی ہندیہ میں ہے: 
                                          على الرجل نفقة إمرأته المسلمة و الذمية و الفقيرة و الغنية دخل بها أو لم يدخل ..." الخ ( الباب السابع عشر في النفقات، ١/ ٥٤٤، ط: رشيدية)
وفيه أيضاً:
"الكسوة واجبة عليه بالمعروف بقدر ما يصلح لها عادةً صيفاً و شتاء، كذا في التتارخانية ناقلاً عن الينابيع". (مطلب في الكسوة، ١/ ٥٥٥)
و فيه أيضاً:
السكنى لها عليه في بيت خال عن أهله و أهلها..." الخ ( الفصل الثاني في السكني ١/ ٥٥٦)

                پس صورتِ مسئولہ میں سائلہ کے شوہر کا عمل خلافِ شرع ہے جو آخرت میں اس کے لیے پکڑ اور پشیمانی کا باعث ہوگا،
 ہر شخص اپنی اولاد کے لئےحد درجہ شفیق ہوتا ہے اس لئے اولاد کی پرورش میں لوگ اپنی راحت و آرام کو قربان کر دیتے ہیں طلاق کے بعد نکاح ثانی کو عموماً عورتیں اسی لئے پسند نہیں کرتیں کہ بچے کے لئے مسائل پیدا ہو جائیں گے  لہذا جبکہ آپکے شوہر نے بچے کی پوری ذمہ 
داری لی تھی تو ان کا اخلاقی فریضہ ہے کہ اپنے وعدہ پر قائم رہے ،وعدہ خلافی کرنااللہ کی نظر میں بڑا گناہ ہےنیز شوہر پر لازم ہے کہ وہ دونوں بیویوں کے درمیان حتی الامکان رہائش ،نفقہ،شب گزاری اور دیگر امور میں برابری کریں ،بغیر کسی عذر کے یا بیوی کے تقاضہ کے بغیر اسے مائکہ رخصت نہ کرے، اور جب بھی بیوی مائکہ جائے تو اسے لانے میں ٹال مٹول نہ کرے ۔

واللہ اعلم بالصواب

دارالافتاء
بیت المعارف خیرآباد
( اودھ)

بسم الله الرحمن الرحيم

Home

Services

Stay Updated

Your Opinion / Message